Фолк Фест “Валандово 2023” со одлична музичка програма од 26-ти до 28-ми Мај
Како и секоја година, така и оваа во градот на калинките ќе се одржи 36-то издание на еден од најстарите музички фестивали во Македонија “Фолк Фест Валандово”.
Успешниот минатогодишен концепт останува и годинава, три вечери музика во градот на песната.
На 26-ти мај на плоштадот во Валандово, со почеток од 21 час. на сцената ќе настапат Распеани Валандовчани, Јоце Панов и Жељко Самарџиќ, а на 27-ми мај на истата сцена ќе настапат Ефто Пупиновски, Ана Бекута и Куку Леле.
Што се однесува до официјалниот дел на овогодинешното издание на “Фолк Фест Валандово”, ќе стартува на 28-ми мај од 20:30 часот во салата “Јанко Узунов” и ќе бидат испеани дваесет новокомпонирани македонски песни.
Како што кажаа организаторите на прес-конференцијата одржана во Валандово, ќе се доделат неколку награди од кои ќе ја споменеме Наградата за животно дело, а годинава ќе му биде доделена постхумно на нашиот Ѓоко Дончев.
Ревијалниот дел на фестивалот ќе му биде посветена на македонскиот виртуозен хармоникаш и музички творец Милан Завков.
Милан Завков на сцената има соработувано со многу имиња, а зад него ќе останат над 150 авторски творби, многу трајни снимки и повеќе дискографски изданија, меѓу кои врвните хит-мелодии како “Заиграј со мене”, отпеана од Виолета Томовска, “Камен да беше срцето” и “Свири мајсторе” од Гоце Арнаудов, “Нема друга Македонија” од Војо Стојаноски, “Лична Јовано” и “Лазарополе” од Наум Петрески, “Пат за Стамболград” и “Мораш душо да ме разбереш” од Благица Павловска, како и други создадени за Атина Апостолова, Пепи Бафтировски, Сузана Спасовска, Ленче Кукиќ, Миле Кузмановски, Зуица Лазова, Милица Кузмановска, Ефто Пупиновски. Секако, Милан Завков низ годините се истакнува и како солист инструменталист со многу ора и чочеци и се здобива со углед на еден од најдобрите хармоникаши во Македонија, но и на просторите на поранешна Југославија.
Валандово ве очекува!
